MRO. DAVID SAMMUT

David Sammut twieled f'Raħal Ġdid fit-18 ta' Awwissu 1971, iben Annunziatio u Jane Sammut. Huwa miżżewweġ u għandu tifel, Daniel ta' tliet snin.

Beda l-istudji mużikali tiegħu fuq il-vjolin min għomor bikri u rebaħ bosta premijiet prestiġjużi. Ingħaqad bħala alliev mal-Banda De Paule u stinka ħafna fuq is-saxophone sopran taħt is-Surmat Joseph Xuereb u ħareġ idoqq għall-ewwel darba mal-Banda ta' pajjiżu ta' tnax-il sena, nhar il-Ġimgħa l-Kbira l-20 ta' April tal-1984. Issokta japprofondixxi l-istudji tiegħu fuq is-saxophone għand diversi surmastrijiet fosthom Freddie Mizzi u Joseph Vella.

Mro. Sammut studja t-teorija u l-kompożiżżjoni għand Mro. Ray Sciberras u Mro Pawlu Grech u ħa t-tagħlim fid-direzzjoni għand is-surmast Joseph Sammut.

Minbarra l-istrumenti kollha fil-familja tas-saxophone u l-vjolin, idoqq il-mandolina, il-bouzouki u l-Irish whistle. Mro. Sammut huwa mużiċista mfittex sewwa u jdoqq ma' numru ta' bands lokali f'għadd ta' funzjonijiet. Dan l-aħħar għamel tour fl-Olanda fejn daqq ma' tribute artist. Hu kien jifforma parti mill-ewwel saxophone quartet f'pajjiżna li dejjem intlaqa' tajjeb kull fejn daqq.

Fl-1997 beda jgħallem is-sezzjoni ta' l-injam fl-iSkola tal-mużika Dun Karm Bologna fi ħdan is-Soċjeta' De Paule u iktar tard klassi tat-teorija fl-istess skola. Fis-sena 2003 inħatar Assistent Direttur tal-Banda Kristu Re flimkien ma' Kevin Abela u matul dan iż-żmien idderieġa b'mod innovattiv diversi kunċerti tal-Banda.

Huwa kompożitur ta' diversi siltiet għall-banda esegwiti mill-Banda Kristu Re fosthom il-Mixja, miktuba għall-okkażjoni tal-kunċert tad-dħul ta' Malta fl-Unjoni Ewropeja. Kiteb ukoll Tislima, Moods, Daniels Lullabye, Outbursts of Love, The Golden Trumpet u Solemnis, miktuba fl-okkażjoni tal-25 anniversarju tal-Presidenza tas-sur Joseph Boffa. Huwa wkoll kompożitur ta' diversi marċi brijużi u funebri u għamel ħafna arranġamenti għall-banda.

David Sammut idderieġa l-Banda Kristu Re għall-ewwel darba bħala Surmast Direttur nhar is-Sibt 26 ta' Lulju 2008, lejliet il-Festa Kristu Re, meta nħatar uffiċjalment bħala surmast. Id-direzzjoni, il-kompożizzjoni u l-abilita' li jdoqq għadd ta' strumenti huma t-trepied li fuqu David Sammut qed isawwar in-niċċa tiegħu fil-qasam mużikali. Is-Soċjeta' hija kburija b'Surmat Direttur Pawlist li beda l-karriera tiegħu proprju fl-istess każin erbgħa u għoxrin sena ilu u tinsab konvinta li hu se jkompli fuq il-passi tal-bravu Surmat Archibald Mizzi li mexxa l-Banda fil-ħmistax'il sena li għaddew u għen biex il-livell tagħha jinsab fejn hu llum.